ភ្នំពេញ៖ ប្រធានក្រុមហ៊ុន មេកខ្យង (Maekjung Group) លោក ចាង ដេវ៉ាន (Chang Dae-whan) បានមកអញ្ជើញសម្ដេចតេជោដោយផ្ទាល់ដើម្បីចូលរួមវេទិកា World Knowledge Forum ឆ្នាំ ២០២៤ ដែលនឹងប្រព្រឹត្តិទៅនៅក្នុងខែកញ្ញា ខាងមុខ។

ការអញ្ជើញនេះធ្វើឡើងក្នុងជំនួបរវាងប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនកម្ពុជា សម្ដេចតេជោ ហ៊ុន សែន និង លោក ចាង ដេវ៉ាន (Chang Dae-whan) នៅវិមាន៧មករា រាជធានីភ្នំពេញ ព្រឹកថ្ងៃទី២៦ ខែ មីនា ឆ្នាំ ២០២៤ នេះ។

សម្តេចតេជោបានទទួលយកការអញ្ជើញនេះនឹងជូនពរដល់គណៈប្រតិភូលោក ចាង ទទួលបានជោគជ័យនៅក្នុងដំណើរទស្សនកិច្ចនៅកម្ពុជាផងដែរ។

វេទិកាចំណេះដឹងពិភពលោក (WKF) គឺជាវេទិការបស់អង្គការក្រៅរដ្ឋាភិបាលអន្តរជាតិ ដែលមានគោលបំណងលើកកម្ពស់កំណើន និងវិបុលភាពសកលប្រកបដោយតុល្យភាពតាមរយៈការចែករំលែកចំណេះដឹង ប្រមូលផ្តុំអ្នកដឹកនាំសកលលោកដើម្បីដោះស្រាយបញ្ហាប្រឈមក្នុងឱកាសនៃពិភពលោកដែលផ្លាស់ប្តូរយ៉ាងឆាប់រហ័ស។ វេទិកានេះត្រូវបានបង្កើតឡើងជាផ្នែកមួយនៃគម្រោង Vision Korea ដែលជាយុទ្ធនាការដែលបានចាប់ផ្តើមដោយកាសែតពាណិជ្ជកម្ម Maeil ក្នុងឆ្នាំ១៩៩៧ដើម្បី «ស្នើចក្ខុវិស័យថ្មីសម្រាប់ការអភិវឌ្ឍន៍ដល់ប្រទេសកូរ៉េ និងសហគមន៍ពិភពលោក»។

វេទិកានេះក៏មានការចូលរួមពីអតីតអ្នកដឹកនាំពិភពលោកនានាផងដែរក្នុងឆ្នាំ២០២៣ មានការចូលរួមពីប្រធានាធិបតីអាមេរិកទី៤៣លោក Gorge W bush អតីតនាយករដ្ឋមន្ត្រីអង់គ្លេសលោក David Cameron អតីតអធិការបតីអាល្លឺម៉ង់លោក Gerhard Schroder អតីតប្រធានាធិបតីបារាំងលោក Francois Hollande និងបុគ្គលល្បីៗពិភពលោកជាច្រើនទៀតដូចជាលោក Bill Gate ជាដើម៕